🧹
唔知大家記唔記得，上年四月嘅時候我哋喺坪洲進行過山野清潔，當時已經發現島上海岸垃圾問題比較嚴重，而到咗上個月嘅時候，香港嘅東北季候風同埋水流將海洋廢物帶至坪洲不同海岸，令垃圾問題變得更加嚴重，所以我哋決定喺坪洲舉行我哋嘅年度清潔活動，希望可以減少海岸垃圾對沙灘嘅影響。
去到上個月嘅 16 號，我哋綠色希望聯同 106 位義工兵分三路，去到坪洲 6 個沙灘進行海灘及山野清潔，經過一個下午嘅努力，我哋一共喺 6 個沙灘清理左最少 476.8 kg 嘅山野垃圾。喺今次清潔行動中，好多謝咁多位參與活動嘅義工，希望大家都可以喺清潔過程中學到有關垃圾分類及回收嘅知識，同時我哋都要感謝 坪洲填海關注組 嘅 Tony 參與今次活動，以及向參加者分享明日大嶼對坪洲海岸生態以及環境嘅影響。
除咗進行山野清潔外，我哋喺當日仲設計咗 4 條難度不同嘅清潔路線，令到參加活動嘅義工可以喺清潔山野嘅同時，又可以欣賞到坪洲海岸嘅優美景色，以及享受到行山嘅樂趣。
當日清潔過程中，我哋發現咗唔少好似膠水樽同埋膠袋等等嘅生活垃圾，所以大家喺日常生活中嘅垃圾回收同埋減廢喺十分重要嘅，只要我哋每日堅持，沙灘上嘅垃圾就可以慢慢咁減少，如果唔係，就算我哋綠色希望日日都舉行山野清潔行動，沙灘上嘅垃圾都只會有增無減。
#greenhopehk #綠色希望 #山野清潔 #義工 #清道夫 #環保 #週末活動 #環保義工 #山野無痕 #山徑垃圾 #野外 #環保教育 #自己垃圾自己帶走 #淨山 #執垃圾 #坪洲 #釣魚翁 #沙灘 #離島
Comments